អាជ្ញាធរក្រុងកែប ចុះពិនិត្យការលក់ដូរ និងណែនាំអាជីវករផ្សារក្តាម មុនឱកាសបុណ្យចូលឆ្នាំប្រពៃណីចិន-វៀតណាម
កែប៖ រដ្ឋបាលក្រុងកែប សហការជាមួយ មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ចុះណែនាំ ដល់បងប្អូនអាជីករលក់ដូរនៅផ្សារក្តាម អោយរៀបចំសម្អាតអនាម័យ បរិស្ថាន នៅទីតាំងលក់ដូររបស់ខ្លួនអោយបានល្អ ដើម្បីត្រៀមទទួលភ្ញៀវទេសចរជាតិ បរទេស ដែលនឹងមកលេងខេត្តកែប ក្នុងឱកាសបុណ្យចូលឆ្នាំប្រពៃណីចិន-វៀតណាម ខាងមុខនេះ។
លោក ឃន វុទ្ធី អភិបាលក្រុងកែបបានអោយដឹងនាថ្ងៃទី២៧ ខែមករា ឆ្នាំ២០២៥ នេះថា ដោយមានការណែនាំពីឯកឧត្តម បណ្ឌិត សោម ពិសិដ្ឋ អភិបាលខេត្ត លោកបានដឹកនាំមន្រ្តីជំនាញ ដោយបានការសហការពីមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះអប់រំផ្សព្វផ្សាយ ណែនាំ ដល់បងប្អូនអាជីវករលក់ដូរនៅផ្សារក្តាម អំពីច្បាប់ស្ដីពីមាត្រាសាស្ត្រកម្ពុជា ការរៀបចំសណ្តាបធ្នាប់សាធារណៈ អនាម័យ បរិស្ថាន និងការលក់ដូរដោយភាពរួសរាយរាក់ទាក់ និងស្មោះត្រង់ ដើម្បីផ្តល់នូវទំនុកចិត្តជូនដល់អ្នកទេសចរ។
លោកបន្ដថា ដើម្បីធានាបាននូវសន្ដិសុខសណ្ដាប់ធ្នាប់ របៀបរៀបរយ ដើម្បីស្វាគមន៍អ្នកទេសចរក្នុងឱកាសបុណ្យចូលឆ្នាំប្រពៃណីចិន-វៀតណាម ខាងមុខនេះ អាជ្ញាធរបានរៀបចំរួចរាល់អនាម័យ បរិស្ថាន សន្ដិសុខ សណ្ដាប់ធ្នាប់សាធារណៈនានា នៅតាមបណ្តាទីតាំងរម្មណីដ្ឋានក្នុងមូលដ្ឋានក្រុងកែប៕
