ចេញផ្សាយ ថ្ងៃទី 14/03/2022

តើម្ចាស់ល្បែងភ្នាល់បាល់អនឡាញ ដែលមានយីហោ (ម្លប់ជ្រៃ)មានអំណាចធំប៉ុណ្ណា បានជាបង្ក្រាបមិនទាន់បានប៉ុន្មានផង ស្រាប់តែពេលនេះបើកដំណើរការទទួលភ្ញៀវចូលលេងបានជាធម្មតា…

(ភ្នំពេញ) ៖ បើតាមសេចក្តីរាយការណ៍បានឱ្យដឹងថា ទីតាំងល្បែងភ្នាល់បាល់តាមប្រព័ន្ធអនឡាញ ផ្លាកយីហោ (ម្លប់ជ្រៃ) ស្ថិតនៅចំណុចផ្ទះលេខ ៧៨០ តាមបណ្តោយផ្លូវលេខ៤៧៤ ក្នុងសង្កាត់បឹងត្របែក ខណ្ឌចំការមន ពេលនេះបានបើកដំណើរការទទួល អ្នកលេងវិញហើយក្រោយពីផ្អាកអស់មួយរយៈមក។

 

 

 

តាមប្រភពពីប្រជាពលរដ្ឋដែលរស់នៅក្បែរ ទីតាំង ខាងលើបានប្រាប់ឱ្យដឹងថា ទីតាំងល្បែងមួយនេះមិនខ្លាចអាជ្ញាធរ ឬសមត្ថកិច្ចនោះឡើយ ប្រហែលម្ចាស់ទីតាំងគេមានខ្សែធំហើយមើលទៅ បានជាអាចបន្តភ្នាល់លេងធម្មតាឡើងវិញយ៉ាងរលូន ជាពិសេសទីតាំងខាងលើនេះមិនថាយប់មិនថាថ្ងៃនោះទេ គេ ឃើញ មាន មនុស្ស ម្នាចេញ ចូលចាក់ ជាហូរហែ។ប្រជាពលរដ្ឋក៏បានបញ្ជាក់ដែរថា ទីតាំងខាងលើនេះ ធ្លាប់ត្រូវបានសមត្ថកិច្ចចុះធ្វើការបង្ក្រាបចំនួន២ដងរួចមកហើយ ប៉ុន្តែនៅតែអាចបេីកឡើងវិញបាន ដោយគេសង្ស័យថា ការបង្ក្រាបគ្រាន់តែជាឆាកល្ខោនឲ្យមហាជនបានឃើញនោះទេ ឱ្យការបើកឡើងវិញបានធម្មតាប្រហែលជា មានការបើកភ្លើងខៀវ ពីអាជ្ញាធរជាក់ជាមិនខាន។

 

យ៉ាងណាក៏ដោយ ប្រជាពលរដ្ឋស្នើដល់អាជ្ញាធរ ជាពិសេស លោក ថេង សុថុល អភិបាលខណ្ឌចំការមន សូមជួយមើលទីតាំងល្បែងស៊ីសងនៅចំណុចខាងលើនេះផង ព្រោះបើតាមដឹងក្នុងមូលដ្ឋាន ខណ្ឌចំការមននេះ មានល្បែងស៊ីសង ភ្នាល់បាល់តាមប្រព័ន្ធអុីនធើណេតជាច្រើនកន្លែង ដែលគេធ្វើការផ្សាយចេញពី(កាស៊ីណូ)កំពុងបើកដំណើរការយ៉ាងរលូន ខណៈសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តែងតែប្រកាសប្រាប់ឱ្យអាជ្ញាធរបង្រ្កាបល្បែងស៊ីសង ក្នុង មូលដ្ឋានរបស់ខ្លួនឲ្យអស់ ៕